प्रारम्भिक जीवन

मिति २०८१/०४/०८ गतेका दिन बागमती प्रदेश सरकार मुख्यमन्त्रीको रूपमा नियुक्त हुनुभएको मा. बहादुर सिहं लामा राजनैतिक वृतमा विकासबादी नेताको रूपमा परिचित हुनुहुन्छ। बुवा स्व.दिप बहादुर तामाङ र आमा स्व. पुर्णिमाया तामाङको कोखबाट २०२७/०७/०८ गते नुवाकोटको किस्पाङ्ग गाउँपालिका ५ मनकामनामा वहाँको जन्म भएको हो।सामान्य परिवारमा जन्मेर पनि पारिवारिक पृष्ठभुमिले सानै उमेर देखि अब्बल र हक्की स्वभावका लामाले गाउँकै स्कुल बाट नि.मा.बि, सदरमुकाम बाट एस. एल. सि तथा काठमाडौको शंकर देव क्याम्पस  बाट स्नातक सम्मको शिक्षा हाँसिल गर्नुभएको छ।

सानै देखि एकात्मक शासन व्यवस्थाको विरूद्ध प्रजातान्त्रिक विचार पक्षमा लाग्नुभएको लामाले २०४३ सालदेखि नेपाली काङ्ग्रेस भातृ संगठन नेपाल विद्यार्थी संघ को सदस्यताबाट पार्टि राजनीति सुरूवात गर्नुभएको हो। त्यस पश्चात ने.बि संघ शंकरदेव क्याम्पस ईकाई सदस्य, २०४५ सालमा नेपाल विद्यार्थी संघ नुवाकोट क्षेत्रिय सभापति, जिल्ला उपसभापति हुँदै वहाँ काङ्ग्रेस राजनीतिमा उदाउनुभएको हो। २०५४ सालको स्थानीय तहको निर्वाचनमा नुवाकोट जिल्लाको तत्कालीन मनकामना  गा.वि.स अध्यक्ष पदमा भारी मतका साथ निर्वाचित लामा पार्टीको १३ औं तथा १४ औं महाधिवेशनमा निरन्तर केन्द्रीय सदस्यको जिम्मेवारीमा हुनुहुन्छ। २०६४ सालमा नुवाकोट क्षेत्र नं. ३ बाट संविधानसभा सदस्य पदको निर्वाचनमा झिंनो मतान्तरले पराजित भएपनि २०७० सालमा भएको दोस्रो संविधानसभा निर्वाचनमा तत्कालीन एकीकृत माओवादी (हालको नेकपा माओवादी केन्द्र) का महासचिव चर्चित नेता  पोष्टबहादुर बोगटीलाई भारी मतान्तरले पराजित गरेर संविधानसभा सदस्य पदमा निर्वाचित हुनु भएको थियो।लामा २०७४ सालमा प्रतिनिधिसभा सदस्य तथा २०७९ सालमा बागमती प्रदेशसभा सदस्य निर्वाचित हुनुभएको थियो।नेपाली कांग्रेस केन्द्रिय समितीका सबल र प्रभावशाली लामा, काङ्ग्रेस बृत्तमा जेष्ठ बर्याता र लोकप्रियतकाकै कारण बागमती प्रदेश संसदीय दलको नेतामा निर्वाचित हुनु भएको हो ।गत २०७९ चैत २६ गते सरकारमा आर्थिक मामिला तथा योजना मन्त्रालयको जिम्मेवारी सम्हालेका उनी योजनाबद्ध विकासको अवधारणालार्इ नेतृत्व गर्ने र सबैपक्ष समेट्न सफल नेताको रूपमा परिचित हुनुहुन्छ।

एक सफल निर्माण व्यवसायीको पृष्ठभूमीबाट राजनीतिमा आउनुभएका लामाले युरोप, अमेरिका, जापान, कोरिया, सिंगापुर लगायत विश्वका अधिकांश विकशित मुलुकहरूको भ्रमण गरिसक्नु भएको छ। नुवाकोटको ग्रामिण परिवेश देखी संघिय सांसद हुदै प्रदेश मुख्यमन्त्रीको जिम्मेवारी सम्हाली रहनु भएका लामा आफुलाई ग्रामिण क्षेत्रको सामाजिक तथा भौतिक बिकासको नेतृत्व गरिरहनु भएको नेताका रुपमा पहिचान बनाउन सफल हुदै जनताको घरदैलो देखि राष्ट्रिय राजनीति सम्म प्रभाव जमाउन सक्ने नेताका रुपमा परिचीत हुनुहुन्छ।